2017 ജൂൺമാസം വിൽപ്പന നികുതിക്ക് പകരമായി ചരക്ക് സേവന നികുതി രാജ്യത്ത് പ്രാബല്യത്തിൽ വന്നതിന് ശേഷം പ്രസ്തുത നിയമപ്രകാരം രജിസ്ട്രേഷൻ എടുത്ത വ്യക്തികളുടെ കച്ചവട സ്ഥാപനങ്ങളിൽ നടക്കുന്ന ചരക്കുകളുടെ വില്പനയോടൊപ്പം വ്യക്തിപരമായി അവർ നടത്തുന്ന സേവനങ്ങളും പ്രതിഫലം പറ്റുന്നവ യാണെങ്കിൽ നികുതി വിധേയമാണെന്ന കാര്യം പലരും ഇപ്പോഴും ഉൾക്കൊണ്ടതായി തോന്നുന്നില്ല. ആദായ നികുതി റിട്ടേൺ സമർപ്പിക്കുമ്പോൾ ബിസിനസിൽ നിന്നുള്ള വരുമാനം കുറവുള്ള വ്യക്തികൾ മറ്റു വരുമാനം എന്ന് പറഞ്ഞു വരുമാനം ഉയർത്തി കാണിക്കുന്ന ഒരു പ്രവണത നിലവിലുണ്ടല്ലോ. അത്തരം ആളുകൾക്കെല്ലാം ചരക്ക് സേവന നികുതി ഡിപ്പാർട്ട്മെന്റിൽ നിന്നും പ്രസ്തുത വരുമാനത്തിന് ജിഎസ്ടി അടക്കണം എന്ന് ആവശ്യപ്പെട്ടുകൊണ്ടുള്ള നോട്ടീസുകൾ വ്യാപകമായി അയച്ചുകൊണ്ടിരിക്കുകയാണ്.ആദായ നികുതി റിട്ടേണിൽ ഒരു വർഷത്തെ വരുമാനം പ്രഖ്യാപിക്കുമ്പോൾ ഗാർഹിക ചെലവുകളും വ്യക്തമായ തെളിവുകളുള്ള ചിട്ടി,ലോൺ അടവ്, വ്യക്തമായ തെളിവുകളുള്ള മറ്റു ചിലവുകൾ എന്നിവ ക്കായി ഉപയോഗിച്ച സംഖ്യ, കുട്ടികളുടെ പഠനച്ചെലവ് എന്നിവ ഉൾപ്പെടെ ഒരു വർഷം ചിലവഴിച്ച തുകയ്ക്ക് തത്തുല്യമായ വരുമാനം നിർബന്ധമായും വെളിപ്പെടുത്തേണ്ടത് ആണല്ലോ. അങ്ങിനെ വെളിപ്പെടുത്താത്ത വരവുകൾ വിശദീകരിക്കാൻ കഴിയാത്ത വരുമാനം എന്ന് പരിഗണിച്ച് കൂടിയ നിരക്കിൽ നികുതി നിർണയം നടത്താവുന്നതാണ്. ആയതിനാൽ യഥാർത്ഥ വില്പന വെളിപ്പെടുത്താതെ സാങ്കല്പികമായ വിറ്റു വരവ് ജി എസ് ടി റിട്ടേണിൽ പ്രഖ്യാപിക്കുന്ന വ്യാപാരികൾ കൊടിയ ഭവിഷത്തുകൾ നേരിടേണ്ടി വരാൻ സാധ്യതയുണ്ട്.
മൂല്യ വർദ്ധിത നികുതി നിയമത്തിൽ വിൽപ്പന നടക്കുമ്പോഴാണ് നികുതി നിർണയിക്കപ്പെട്ടതെങ്കിൽ ചരക്ക് സേവന നികുതി നിയമത്തി ൽ സപ്ലൈ അഥവാ വിതരണം നടക്കുമ്പോഴാണ് നികുതി നിർണയിക്കപ്പെടുന്നത്.വിൽപ്പനയെ അപേക്ഷിച്ച് സപ്ലൈ അഥവാ വിതരണം കൂടുതൽ വ്യാപ്തിയുള്ളതാണ് എന്ന് വ്യക്തമാണല്ലോ.ചരക്ക് സേവന നികുതി നിയമം 7 (1) വകുപ്പ് പ്രകാരം വിൽപ്പനയോ പുനർവിതരണമോ അല്ലെങ്കിൽ ബിസിനസിന്റെ ഭൗതിക സാഹചര്യങ്ങൾ മെച്ചപ്പെടുത്തുകയോ ലക്ഷ്യമിട്ട് പ്രതിഫലാച്ചയോടെ നടക്കുന്ന എല്ലാവിധ വിതരണങ്ങളും വിനിമയങ്ങളും കൈമാറ്റങ്ങളും സപ്ലൈയുടെ പരിധിയിൽ വരുന്നതാണ്.വാടക പാട്ടക്കരാർ ലൈസൻസ് എന്നീ കരാറുകളുടെ ബലത്തിൽ മുറികളോ കെട്ടിടങ്ങളോ സാധനങ്ങളോ ഉപയോഗിക്കാൻ അനുവദിക്കുന്നത് പ്രതിഫലേച്ചയോടെ ആണെങ്കിൽ അതും സപ്ലൈ ആയാ ണ് പരിഗണിക്കുന്നത്.
7 (1 )വകുപ്പിന്റെ ഗഹനതയിലേക്ക് പ്രവേശിക്കാതെ സപ്ലൈ അഥവാ വിതരണത്തിന്റെ ഭാഗമായി പ്രഖ്യാപിക്കപ്പെടുന്ന ഓഫറുകളും സമ്മാനങ്ങളും ഡിസ്കൗണ്ടുകളും ഇൻസെന്റീവുകളും നികുതി വിധേയമാവുകയും ആവാതിരിക്കുകയും ചെയ്യുന്ന സാഹചര്യങ്ങളെക്കുറിച്ച് ചർച്ച ചെയ്യുവാനാണ് ഇവിടെ ഉദ്ദേശിക്കുന്നത്.ഇവയെ പൊതുവേ മൂന്നായി തരം തിരിക്കാം. 1.സൗജന്യമായി നിശ്ചിത സമയത്തേക്ക് സേവനങ്ങൾ നൽകുന്നതും സാധനങ്ങൾ സാമ്പിൾ ആയി നൽകി അവയുടെ ഗുണനിലവാരം ബോധ്യപ്പെടുത്തുന്നതിനും പല വിതരണക്കാരും അവരുടെ വ്യാപാരന്ത്രത്തിന്റെ ഭാഗമായി ശ്രമിക്കാറുണ്ട്. ഉദാഹരണത്തിന് ഫാർമസ്യൂട്ടിക്കൽ കമ്പനികൾ).ഇത്തരം സന്ദർഭങ്ങളിൽ വകുപ്പ് 7 (1) പ്രതിപാദിക്കുന്നത് പോലെ പ്രതിഫലേച്ചകൂടാതെ നൽകുന്ന സപ്ലൈപൊതുവേ നികുതി വിധേയമല്ല( ഷെഡ്യൂൾ ഒന്നിൽ പരാമർശിച്ച ചുരുക്കം ചില സന്ദർഭങ്ങളിൽ ഒഴികെ) എന്ന് മനസ്സിലാക്കുവാൻ വലിയ പ്രയാസമില്ല. എന്നാൽ സെക്ഷൻ 17 (5)ലെ വ്യവസ്ഥകൾക്ക് വിധേയമായി മാത്രമേ ഇത് നടപ്പിലാക്കാൻ കഴിയൂ. പ്രസ്തുത വകുപ്പ് പ്രകാരം മോഷ്ടിക്കപ്പെടുകയോ നഷ്ടപ്പെടുകയോ, നശിച്ചുപോവുകയോ, സ്റ്റോക്കിൽ നിന്നും എഴുതി തള്ളുകയോ, സമ്മാനമായോ സൗജന്യമായോ നൽകുകയോ ചെയ്ത ഉത്പന്നങ്ങളുടെ വാങ്ങുന്ന പോയിന്റിൽ നൽകിയ ഇൻപുട്ട് ടാക്സ് ക്രെഡിറ്റ് നേരത്തെ ക്ലെയിം ചെയ്തിട്ടുണ്ടെങ്കിൽ അത് റിവേഴ്സ് ചെയ്യേണ്ടിവരും.
2.ബൈ വൺ ഗെറ്റ് വൺ ഓഫർ.നിശ്ചിത എണ്ണം സാധനങ്ങൾ വാങ്ങുമ്പോൾ നിശ്ചിത എണ്ണം ഫ്രീയായി നൽകുന്ന ഓഫറുകൾ കൈകാര്യം ചെയ്യുന്ന രീതി ഇതിൽ നിന്നും തികച്ചും വ്യത്യസ്തമാണ്.ഉദാഹരണത്തിന് രണ്ട് ഷർട്ട് വാങ്ങുമ്പോൾ ഒരു ഷർട്ട് ഫ്രീയായി നൽകുന്ന സാഹചര്യം പരിശോധിക്കാം. ഇവിടെ രണ്ട് ഷർട്ടിന്റെ വിലയ്ക്ക് മൂന്നു ഷർട്ടുകൾ നൽകുകയാണ് ചെയ്യുന്നത്. ഇത്തരം സന്ദർഭങ്ങളിൽ ഇൻപുട്ട് ടാക്സ് ക്രെഡിറ്റ് റിവേഴ്സ് ചെയ്യേണ്ട ആവശ്യമില്ല. ഇൻവോയ്സിൽ ഫ്രീ എന്ന് എഴുതാതിരിക്കാൻ പ്രത്യേകം ശ്രദ്ധിച്ചാൽ മതി.എന്നാൽ ഇങ്ങനെ ഒരു സാധനം വാങ്ങുമ്പോൾ മറ്റൊരു സാധനമാണ് ഫ്രീയായി നൽകുന്നതെങ്കിൽ വകുപ്പ് 8 പ്രകാരം കോംപസിറ്റി സപ്ലൈ ആണോ മിക്സഡ് സപ്ലൈ ആണോ എന്ന് തീരുമാനിച്ചതിനുശേഷം ആയിരിക്കണം പ്രസ്തുത സാധനത്തിന്റെ നികുതി നിരക്ക് തീരുമാനിക്കേണ്ടത്.
3.നിശ്ചിത തുകയ്ക്ക് വാങ്ങുമ്പോൾ നിശ്ചിത ശതമാനം ഡിസ്കൗണ്ട് കൂടുതൽ തുകയ്ക്ക് വാങ്ങുമ്പോൾ കൂടിയ ശതമാനം ഡിസ്കൗണ്ട് എന്ന ഓഫറുകളും സുപരിചിതമാണല്ലോ. ബില്ലിംഗ് നടന്നതിന് മുമ്പും നടന്നതിനുശേഷം ഇത്തരം ഡിസ്കൗണ്ടുകൾ പ്രഖ്യാപിക്കപ്പെട്ടേക്കാം.ബില്ലിംഗ് നടക്കുന്ന സമയത്ത് ഡിസ്കൗണ്ട് പ്രത്യേകമായി രേഖപ്പെടുത്തി ബില്ലി ഇഷ്യൂ ചെയ്യുകയാണെങ്കിൽ അത്തരം ഡിസ്കൗണ്ടുകൾ പൂർണ്ണമായും നികുതി വിമുക്തമാണ് എന്നാൽ ബില്ലിംഗ് ചെയ്തതിനുശേഷം കൂടുതൽ പർച്ചേസ് പ്രോത്സാഹിപ്പിക്കാൻ വേണ്ടി ഡിസ്കൗണ്ട് പ്രഖ്യാപിക്കപ്പെടുകയാണെങ്കിൽ സെക്ഷൻ 15 മൂന്നിൽ പ്രതിപാദിച്ചത് പോലെ വാങ്ങിയ ഡീലർ ഇൻപുട്ട് ക്രെഡിറ്റ് റിവൈസ് ചെയ്യുന്ന മുറയ്ക്ക് സപ്ലയർക്ക് നികുതി ഇളവ് അവകാശപ്പെടാവുന്നതാണ്. ഇത്തരം ഘട്ടങ്ങളിൽ ഒന്നും സപ്ലെയർ ഇൻപുട്ട് ക്രെഡിറ്റ് റിവൈസ് ചെയ്യേണ്ട ആവശ്യം വരുന്നില്ല.
