കലയുടെ ലോകം വിശാലവും അനന്തവുമാണ്. മനുഷ്യന്റെ സങ്കല്പങ്ങൾക്കും അനുഭവങ്ങൾക്കും അതീതമായി ജീവിതത്തിന്റെ പച്ചയായ യാഥാർത്ഥ്യങ്ങളെ കൊത്തി വരയ്ക്കാനും ഒപ്പിയെടുക്കാനും ചിത്രം വര എഴുത്ത് തുടങ്ങിയ കലകളിലൂടെ സാധ്യമാകുന്നു.
വിവാഹശേഷം വെറുമൊരു വീട്ടമ്മയായി ഒതുങ്ങിക്കൂടാതെ ഭർത്താവ് സിദ്ദിഖിന്റെ പൂർണ്ണ പിന്തുണയോടെ കലയുടെ ലോകത്ത് റെക്കോർഡുകളുടെ നേട്ടവുമായി സ്വന്തം വ്യക്തിമുദ്ര പതിപ്പിച്ച വ്യക്തിയാണ് ഫറോക്ക് പൂറ്റേക്കാട് സ്വദേശി ഫസ്ന എ കെ.
ചെറുപ്പം തൊട്ടേ കഥകളോടും കവിതകളോടും ഇഴകി ചേർന്നതായിരുന്നു ഫസ്നയുടെ ജീവിതം. ജീവിത നാൾവഴിയിൽ ചായങ്ങൾ തൂകാനുള്ള വരം കൂടി ഫസ്ന സ്വായത്തമാക്കി.
പ്ലസ് ടു വരെ പഠനം ശേഷം വിവാഹം. പിന്നീട് പഠനം മുന്നോട്ടു കൊണ്ടു പോകാൻ സാധിച്ചിരുന്നില്ല. എന്നാൽ അറിവുകൾക്ക് പിന്നാലെ സഞ്ചരിക്കാൻ ഫസ്നയ്ക്ക് എന്നും ഇഷ്ടമായിരുന്നു. അതിനാൽ ലൈബ്രറേറിയൻ കോഴ്സും കമ്പ്യൂട്ടർ കോഴ്സും ചെയ്തു.
പഠിക്കുന്ന കാലത്ത് ഒന്നും സ്വന്തമായി പുസ്തകങ്ങൾ വാങ്ങി വായിക്കുക എന്നത് ഫസ്ന യെ സംബന്ധിച്ച് സാമ്പത്തികമായി പ്രയാസമായിരുന്നു. സ്കൂൾ ലൈബ്രറിയിൽ നിന്നുള്ള പുസ്തകങ്ങളെ ആശ്രയിച്ചായിരുന്നു വായന.
ചെറുതായി കുത്തിക്കുറിച്ചിടാറുമുണ്ടായിരുന്നു. എന്നാൽ എഴുത്തുകൾ ഒന്നും മറ്റൊരാളെ കാണിക്കാനുള്ള ധൈര്യം ഉണ്ടായിരുന്നില്ല. ആത്മവിശ്വാസക്കുറവ് തന്നെയായിരുന്നു പ്രധാന പ്രശ്നം.
നാലാളുടെ മുന്നിൽ തന്റെ രചനകൾ വെളിപ്പെടുത്താനും എഴുത്തിലേക്കും വായനയിലേക്കും ആഴം ഇറങ്ങാനും പ്രചോദനമായത് പ്ലസ് വണ്ണിൽ പഠിക്കുമ്പോൾ ഉണ്ടായ ഒരു കൗതുകമാർന്ന അനുഭവമായിരുന്നു. പ്ലസ് വണ്ണിൽ പഠിപ്പിക്കുന്ന സഹീർ എന്ന അധ്യാപകനെ കുറിച്ച് അദ്ദേഹം തന്നെ എഴുതാൻ പറഞ്ഞപ്പോൾ തമാശരൂപയുടെ ഫസ്ന എഴുതിയ വിവരണം സ്റ്റാഫ് റൂമുകളിൽ പെട്ടെന്ന് വൈറലായി. അതോടെ തന്റെ പഠനം തീർന്നു എന്നു കരുതിയ ഫസ്നയ്ക്ക് ശേഷം സംഭവിച്ച കാര്യങ്ങൾ എല്ലാം കൗതുകത്തോടെ നോക്കി നിൽക്കാനേ സാധിച്ചിരുന്നുള്ളൂ. എന്നാൽ അധ്യാപകൻ അനുമോദിച്ചു കൊണ്ട് പറഞ്ഞത് ” ഇങ്ങനെ എഴുതിയാൽ ഭാവിയിൽ ഒരു കമലാസുരയ്യ ആയി മാറുമല്ലോ “എന്നാണ്. അദ്ദേഹം അന്ന് പറഞ്ഞത് ഒരു പ്ലസ് വൺ വിദ്യാർഥിയിൽ ചെലുത്തിയ സ്വാധീനം ചെറുതായിരുന്നില്ല. ശേഷം കമലാസുരയ്യയുടെ പുസ്തകങ്ങൾ തേടിപ്പിടിച്ച് വായിക്കാനും അവരെക്കുറിച്ച് കൂടുതൽ അറിയാനും ശ്രമിച്ചു. പോകപ്പോകെ കമലാസുരയ്യയോട് കൂടുതൽ ഇഷ്ടം തോന്നിത്തുടങ്ങി. ജീവിതത്തിൽ കൂടുതൽ സ്വാധീനം ചെലുത്തിയ വ്യക്തിയായി മാറിയ അവരോട് ആരാധനയുമായി.
പിന്നീട് താൻ എഴുതിയ കഥകളും കവിതകളും പ്രസിദ്ധീകരിക്കാൻ ആർജ്ജവം ലഭിച്ചു. ആദ്യമായി മലയാള മനോരമയിൽ ചെമ്പരത്തി എന്ന കവിതയാണ് പ്രസിദ്ധീകരിച്ചത്.ആദ്യത്തെ തന്റെ കൃതിയോടുള്ള സ്മരണാർത്ഥം ചെമ്പരത്തി എന്ന തൂലികാനാമം തിരഞ്ഞെടുത്തു.
ശേഷം സജീവമായി തന്നെ പ്രസിദ്ധീകരിക്കാൻ അവസരം ലഭിച്ചു. എഴുത്തുകാരുടെ അതേ ആശയത്തിൽ വായനക്കാർ അത് ഉൾക്കൊള്ളണമെന്നില്ല. അതിനാൽ പിന്നീട് പ്രസിദ്ധീകരിക്കുന്ന സമാഹാരങ്ങളിൽ ആശയത്തിന് ഉതകുന്ന ചിത്രവും ഫസ്ന തന്നെ വരയ്ക്കാൻ തുടങ്ങി. ചിത്രം വര പഠിക്കാത്ത ഫസ്ന യൂട്യൂബ് മറ്റും നോക്കിയായിരുന്നു തന്റെ ചിത്രം വരയിലെ ബാലപാഠങ്ങൾ തുടങ്ങിയത്. ദൈവസഹായം കൊണ്ടോ മറ്റോ എല്ലാം മനോഹരമായി തന്നെ വന്നു.
കുടുംബവും കുട്ടികളും പ്രാരാബ്ധവുമായി ഒഴുക്കിനൊപ്പം ജീവിതം പോകവേ സ്വയം ആത്മപരിശോധനക്ക് വിധേയമായപ്പോൾ നിരവധി ചോദ്യശരങ്ങളാണ് നേരിടേണ്ടി വന്നത്. ഇത്രയും കാലം എന്തു നേടി? എന്താണ് ജീവിത ലക്ഷ്യം? എന്താണ് തന്റെ കർത്തവ്യം? തുടങ്ങി നീളുന്നു ഇവ.
കൂടെ പഠിച്ചവരുടെയും മറ്റുള്ളവരുടെ ചോദ്യവും ആയപ്പോൾ തീർത്തും തകർന്നു പോയി. എന്നാൽ താനെന്ന വ്യക്തി ഭൂമിയിൽ ജീവിച്ചിരുന്നു എന്നെങ്കിലും തന്നെ ബോധിപ്പിക്കേണ്ട ഉത്തരവാദിത്തമുള്ളതിനാൽ തന്നെ തിരയാനും പോരാടാനും തീരുമാനിച്ചു. സ്വന്തം കഴിവിലും അറിവിലും ഉറച്ചു വിശ്വസിച്ച് നിരവധി റെക്കോർഡുകൾക്കായി പരിശ്രമിച്ചു. എന്നാൽ പരാജയം മാത്രമായിരുന്നു തുടക്കഫലം. ഇതിനെക്കുറിച്ച് പറഞ്ഞു തരാൻ തനിക്ക് ചുറ്റും ആരും ഉണ്ടായിരുന്നില്ല. എല്ലാം സ്വയം തേടി കണ്ടുപിടിച്ചു പഠിക്കുകയായിരുന്നു.
യൂണിക് വർക്ക് അല്ല എന്നു പറഞ്ഞ് മൂന്നുതവണ വേൾഡ് റെക്കോർഡിൽ നിന്നും പുറന്തള്ളപ്പെട്ടു. എങ്കിലും തോറ്റുകൊടുക്കാൻ മനസ്സില്ലായിരുന്നു. പിന്നീട് അതൊരു വാശിയായി മാറി. ശേഷം പിറന്നത് ഫസ്നയുടെ ജീവിതത്തിലെ ചരിത്ര നിമിഷങ്ങൾ ആയിരുന്നു. നാലാമത്തെ തവണ ഫസ്ന വേൾഡ് റെക്കോർഡ് കരസ്ഥമാക്കി.
എപിജെ അബ്ദുൽ കലാം വേൾഡ് റെക്കോർഡ്, വജ്ര വേൾഡ് റെക്കോർഡ്, ഇന്റർനാഷണൽ ബുക്ക് ഓഫ് റെക്കോർഡ്, ഇന്ത്യ ബുക്ക് ഓഫ് റെക്കോർഡ്, തുടങ്ങി മലയാളസാഹിത്യ രചനകൾ ഉൾപ്പെടുത്തിയ സമാഹാരമായ പെൻഡ്രൈവിന് ഏഷ്യ വേൾഡ് റെക്കോർഡ്. കേരള ബുക്ക് ഓഫ് റെക്കോർഡ്, ലണ്ടൻ ബുക്ക് ഓഫ് റെക്കോർഡ്, യൂണികോൺ വേൾഡ് റെക്കോർഡ്, അംബേദ്കർ പുരസ്കാരം, യൂത്ത് ഐക്കൺ പുരസ്കാരം, ബെസ്റ്റ് ആർട്ടിസ്റ്റ് ഓഫ് ദ ഇയർ അവാർഡ്, ബെസ്റ്റ് വുമൺ അവാർഡ്, ജെ സി ഐ പുരസ്കാരം എന്നിവയും ലഭിച്ചു. പള്ളിക്കാട്ടിലെ മാലാഖ, ചെമ്പരത്തി എന്നീ പുസ്തകങ്ങളും രചിച്ചു. ഇന്ത്യൻ ഭരണഘടനയിലെ 25 ആർട്ടിക്കിൾ കാണാതെ പഠിച്ച് അത് ഇംഗ്ലീഷ് ക്യാപ്പിറ്റൽ ലെറ്റേഴ്സിൽ 11 മിനിറ്റും 16 സെക്കൻഡും കൊണ്ട് എഴുതി വരച്ചുകൊണ്ട് ഡോക്ടർ അംബേദ്കറുടെ പോർട്രൈറ്റ് ചെയ്തതിനാണ് നാല് റെക്കോർഡുകൾ ലഭിച്ചത്. നിലവിൽ നേട്ടങ്ങൾക്കൊപ്പം ഓട്ടം തുടർന്നുകൊണ്ടിരിക്കുകയാണ് ഈ പെൺകരുത്ത്.
