ചില മന്ദഹാസങ്ങളെ നാം ”മില്യൺ ഡോളർ” എന്നു വിളിക്കും.
കഴിഞ്ഞ ഫെബ്രുവരി ഇരുപത്തിനാലിന് , കൊച്ചിയിലെ റാഡിസൺ ബ്ലൂ ഹോട്ടെലിൽ നടന്ന സൗന്ദര്യ മത്സരത്തിന്റെ പരിസമാപനവേദിയിൽ, ആലപ്പുഴയിലുള്ള ഒരു പ്രമുഖ കോളേജിലെ ഇംഗ്ലീഷ് പ്രൊഫസ്സർ, ശ്രീമതി അനിത ശേഖർ രണ്ടു കിരീടങ്ങളാണ് നേടിയത്. ”മിസ്സിസ് ഇൻസ്പിറേറ്റ 2024 ” എന്ന ആദ്യകിരീടവും ”ടൈംലെസ്സ് ബ്യുട്ടി എന്ന രണ്ടാം കിരീടവും.
അറുപത്തിരണ്ടുകാരിയായ ഈ പ്രൊഫസ്സർ കിരീടങ്ങൾ അണിഞ്ഞ വേദിയിൽ പാർവതി എന്ന അവരുടെ മകളും പ്രൊഫസ്സർ നടരാജൻ എന്ന ഭർത്താവും ചേർന്നു കാഴ്ചവച്ച ഈ ചിത്രത്തിലെ മന്ദഹാസം അതുതന്നെയാണ് – മില്യൺ ഡോളർ !!!
ഈ ഇരട്ടക്കിരീടനേട്ടത്തിനു പിന്നിൽ, ഈ മൂവരും ചേർന്ന ഇവരുടെ ജീവിതം തന്നെയായിരിക്കണം ഏറ്റവും വലിയ പ്രചോദനം.
ആലപ്പുഴയിലെ കോളേജിലെ , ഇംഗ്ലീഷ് ഡിപ്പാർട്ടുമെന്റിന്റെ മേധാവിയാണ്
പ്രൊഫ: അനിത ശേഖർ. വിദ്യാർത്ഥികൾ ഇവരെ ” വൗ ടീച്ചർ” എന്നും ”റോൾ മോഡൽ” എന്നും വിളിക്കുന്നു.
മത്സരവേദിയിൽ വച്ച്, ” ഭാര്യയുടെ ഈ നേട്ടത്തെ എങ്ങിനെ കാണുന്നു ?” എന്ന ചോദ്യത്തിന് പ്രൊഫ്. നടരാജൻ ഇങ്ങിനെയാണ് മറുപടി പറഞ്ഞത്:
” നാല് ദിവസങ്ങൾക്കു മുമ്പ് നിങ്ങൾ എന്റെ ഭാര്യയെ കൂട്ടിക്കൊണ്ടുപോയി. അതിനുശേഷമുള്ള അവളുടെ സന്ദേശങ്ങൾ എനിക്ക് വിസ്മയമുണ്ടാക്കി. എന്റെ ജീവിതപങ്കാളി വളരെയധികം മാറിപ്പോയിരിക്കുന്നു എന്ന് എനിക്ക് മനസ്സിലായി. ഇപ്പോൾ ഈ വേദിയിൽ നിന്നും ഞാൻ എന്റെ വധുവിനെ കൂട്ടിക്കൊണ്ടുപോകാനാണ് വന്നിരിക്കുന്നത്..”
മുപ്പത്തിരണ്ടു വർഷങ്ങൾക്കിപ്പുറവും, ദാമ്പത്യത്തിന്റെ പ്രണയതീവ്രത വർദ്ധിച്ചിട്ടേയുള്ളു എന്ന് പ്രൊഫ് നടരാജൻ കയ്യടികൾക്കിടയിൽ വെളിപ്പെടുത്തി.
നമ്മുടെ സമൂഹത്തിന് അപരിചിതമായ ഒരു മേഖലയാണ് സൗന്ദര്യമത്സരങ്ങളും മോഡലിംഗും എന്ന് പറഞ്ഞുകൂടാ. എങ്കിലും അതിനെസ്സംബന്ധിച്ച അറിവും അവബോധവും ഇപ്പോഴും വളരെയേറെ പരിമിതപ്പെട്ടിരിക്കുന്നു എന്നത് എടുത്തുപറയേണ്ട ഒന്നാണ്.
അല്ലെങ്കിൽ, ഒരു സൗന്ദര്യമത്സരത്തിൽ, രണ്ടു അഭിമാനാർഹങ്ങളായ കിരീടങ്ങൾ നേടി, തിരിച്ചെത്തിയ ഈ അറുപത്തിരണ്ടുകാരിയെ അവരുടെ ഉദ്യോഗദാതാവായ കോളേജ് മാനേജ്മെന്റ് മറ്റു യാതൊരു കാരണവും കൂടാതെ ആ നേട്ടത്തിന്റെ പിന്നാലെ ജോലിയിൽ നിന്നും പിരിച്ചുവിടുകയില്ലായിരുന്നു.
”കോളേജിലെ മറ്റു പ്രിൻസിപ്പൽമാർ താങ്കളുടെ പേരിൽ അസന്തുഷ്ടരാണ്” എന്നാണ് പിരിച്ചുവിടാനുള്ള കാരണമായി പറയുന്നത്.
ഇങ്ങിനെയൊരു അസംബന്ധം കാരണമായി ഉയർത്തിപ്പിടിച്ചപ്പോൾ, ഈ മാനേജ്മെന്റ് ഗുരുതരമായ ഒരു സാമൂഹീക വിപത്തിലേക്കാണ് കടന്നുചെന്നത് . ശ്രീമതി അനിത ശേഖറെ ആ വനിതാദിനത്തിൽ ഒരു പൊതുസമ്മേളനം വിളിച്ചുകൂട്ടി അനുമോദിക്കേണ്ടതിനു പകരം, അന്നുതന്നെ അവരെ പിരിച്ചുവിട്ടുംകൊണ്ട് സ്ത്രീസമൂഹത്തെയാകെ അപമാനിക്കുകയാണ് ചെയ്തത്.
തൊഴിൽ നിയമങ്ങൾ വകവയ്ക്കാതെയുള്ള ഈ ഹീനമായ നടപടിക്കെതിരെ നിയമപരമായി പോരാടുന്നില്ലേ എന്ന ചോദ്യത്തിന്, പ്രൊഫ് അനിത നൽകിയ മറുപടി, ഇതായിരുന്നു:
”ആ സ്ഥാപനത്തിൽ ഞാൻ പഠിപ്പിച്ച ഓരോ കുഞ്ഞുങ്ങളുടെയും മനസ്സിൽ ഞാനുണ്ടാവും , എന്റെ മനസ്സുണ്ടാവും. അവർ എല്ലാക്കാര്യങ്ങളും തിരിച്ചറിയുന്നവരാണ്. എനിക്കുനേരെ ഉയർന്ന അനീതിയുടെ വാൾ അവർ തടുത്തുകൊള്ളും. മാറ്റം വരേണ്ടത് ഹീനമായ പുരുഷ മേധാവിത്വത്തിനാണ്. സ്ത്രീയെ അംഗീകരിക്കാതിരിക്കാനും അപമാനിക്കാനും കാണിക്കുന്ന അശ്ലീലകരമായ വ്യഗ്രതയ്ക്കാണ്. കൂടാതെ, സ്ത്രീതന്നെ സ്ത്രീയുടെ ശത്രുവായിത്തീരുന്ന അധമ കാഴ്ചകൾ കാണാതിരിക്കരുത്. സ്ത്രീ സമത്വമെന്നും സ്ത്രീസുരക്ഷയെന്നും സ്ത്രീ ശാക്തീകരണമെന്നുമൊക്കെ ഘോരഘോരം പ്രസംഗിക്കുന്ന പുരുഷന്മാർ തന്നെയാണ് ഭാര്യയെയും മക്കളെയും ദുരിതത്തിലാഴ്ത്തുന്നത്. ഒറ്റപ്പെടുത്തി അപമാനിക്കുന്നത്.
നിഷ്ടൂരമായ ഇരട്ടത്താപ്പാണിത്. ഒരു തൊഴിലിടമാവുമ്പോൾ അതിന്റെ ആഘാതം വളരെ വലുതാണ്.
സൗന്ദര്യലോകവും മോഡലിംഗുമൊക്കെ സ്ത്രീത്വത്തെ മാതൃത്വത്തോളം ഉയർത്തിപ്പിടിക്കുന്ന തലങ്ങളാണ്. കാലം മാറ്റങ്ങൾ കൊണ്ടുവരുമായിരിക്കാം.
”പേജന്റ്റി ” എന്ന പദം സ്ത്രീയെ ശക്തിപ്പെടുത്താൻ – അവളുടെ ചിന്തകൾക്ക് ഒരു ഉന്നതി നൽകാൻ വിവാഹശേഷം, അടുക്കളയുടെ അതിരുകൾക്കുള്ളിൽ ഒതുങ്ങിപ്പോകാതെ, അമ്മ എന്ന സ്ഥാനം, ഒരു നിബന്ധനയും നിയന്ത്രണവുമാണെന്ന ചിന്തയില്ലാതെ, സമൂഹത്തിനും സ്വയവും ജീവിതമൂല്യങ്ങൾ ഉയർത്തിപ്പിടിച്ചു മുന്നേറാനുള്ള കരുത്തുനൽകുക കൂടിയാണ് ചെയ്യുന്നത്.
‘മിസ്സിസ് കേരളം” എന്ന പേജന്റിന് കേരളത്തിൽ തുടക്കമിട്ട ശ്രീമതി ദീപാപ്രസന്നയും മുംബൈ ”ദിവ പേജന്റ്സ്” ഉടമ അഞ്ജന – കാൾ മസ്കരിനാസ് ദമ്പതിമാരും ഇക്കഴിഞ്ഞ ദിവസം കംബോഡിയയിൽ നടന്ന ” യൂണിവേഴ്സൽ വുമൺ പേജന്റിൽ ഭാരതത്തെ പ്രതിനിധീകരിച്ച അപേക്ഷ ദബ്രാലും പുതുയുഗത്തിന്റെ നാന്ദീ മുഖങ്ങളാണ്. അവർ വളർത്തിയെടുക്കുന്ന നൂതനാശയങ്ങൾ സ്വീകരിക്കാൻ കൂടുതൽ സ്ത്രീകൾ മുന്നോട്ടു വരുമ്പോൾ, സമൂഹവും നാടും പുരോഗമിക്കും. ഓരോ സ്ത്രീയുടെയും നടപ്പിലും എടുപ്പിലും പെരുമാറ്റത്തിലും സ്ത്രൈണതയ്ക്കു പുറമെ, കാരുണ്യവും കരുതലും സ്നേഹവും നിഴലിക്കും.
സ്ത്രീ, ചരിത്രാതീത കാലം മുതൽ സൗന്ദര്യത്തിന്റെയും ശക്തിയുടെയും സഹനത്തിന്റെയും പ്രതീകമായിരുന്നു. മാതൃത്വമെന്നപോലെ, സൗന്ദര്യ മത്സരങ്ങളും എപ്പോഴും സ്ത്രീ അധിനിവേശ മേഖലകളായിരുന്നു. എന്നാൽ, ഇരുപത്തിയൊന്നാം നൂറ്റാണ്ടിലെത്തി നിൽക്കുന്ന നമ്മുടെ സമൂഹത്തിനു സ്ത്രീ ശക്തി എന്ന സങ്കൽപം ഒരു പാഴ് വാക്കായി മാറിപ്പോയ ഒരു ദുരന്തം നാം മുന്നിൽക്കാണുന്നു.
സ്ത്രീയുടെ മേനിയഴകോ, വസ്ത്രാലങ്കാരങ്ങളോ ചമയങ്ങളോ ഒന്നുമല്ല അവളെ സുന്ദരിയാക്കുന്നത്.
മറിച്ച് ആന്തരീക ഊർജ്ജവും ആത്മവിശ്വാസവും ബുദ്ധികൂർമ്മതയും നർമ്മബോധവും ചേർന്ന വ്യക്തിത്വമാണ് സൗന്ദര്യത്തിനാധാരം എന്ന് പുതുലോകം തിരിച്ചറിയുന്നുണ്ട്.
