അമ്മമാർ നൽകുന്ന ഏതൊരു പദാർത്ഥത്തിനും ഗുണമേന്മയും വിശുദ്ധിയും ഉണ്ടായിരിക്കും എന്നത് ഒരു പരമാർഥമാണ്, മായമില്ലാത്തതാണ് അമ്മയുടെ ഓരോ സ്നേഹസമ്മാനവും ഇതൊരു വാസ്തവമാണ്.
അവധി കഴിഞ്ഞ് പുറം നാട്ടിലേക്ക് പറക്കുന്ന മക്കൾക്കും,മരുമക്കൾക്കും ബന്ധുക്കൾക്കും സ്നേഹത്തിന്റെ കരുതൽ എന്നോണം സമ്മാനിച്ച ഉമ്മച്ചിയുടെ കാച്ചിയ വെളിച്ചെണ്ണ മാർക്കറ്റിൽ മുന്തിയ ഇനം ബ്രാൻഡുകൾക്കിടയിൽ സ്ഥാനം പിടിക്കും എന്ന് അൻസിയും ഉമ്മച്ചിയും സ്വപ്നത്തിൽ പോലും വിചാരിച്ചിരുന്നില്ല.
തൃശ്ശൂർ മണ്ണുത്തിക്കാരിയായ അൻസി റേഡിയോഗ്രാഫറായി ജോലി അനുഷ്ഠിക്കവേ ആണ് ജോലിയിലെ സമയക്രമീകരണ ബുദ്ധിമുട്ടുകൊണ്ട് ജോലി ഉപേക്ഷിച്ച് മെഡിക്കൽ ട്രാൻസ്ക്രിപ്ഷൻ എന്ന മറ്റൊരു മേഖലയിലേക്ക് ചേക്കേറിയത്. പിന്നീട് ഈ മേഖലയിലും തുടരാൻ കഴിയാതെയായപ്പോൾ അതും ഉപേക്ഷിച്ചു. ഒന്നും ചെയ്യാതെ വെറുതെ ഇരിക്കുക എന്നത് അൻസിക്ക് ഒരു വെല്ലുവിളിയായിരുന്നു.
ഉമ്മച്ചിയുടെ കാച്ചിയ എണ്ണയുടെ ഗുണനിലവാരം കൊണ്ടും മികച്ച റിസൾട്ട് കൊണ്ടും ബന്ധുക്കളിൽ ഒട്ടനവധി പേർ ആവശ്യക്കാരായി വീണ്ടും തിരക്കി എത്തി.
ഉമ്മച്ചിയുടെ കാച്ചിയ എണ്ണക്ക് ഡിമാൻഡ് ഏറെയുള്ളപ്പോൾ പിന്നെ എന്തിനാണ് മറ്റൊരു മേഖല നോക്കി പോകുന്നത് എന്ന ചിന്തയിൽ നിന്നും പിറന്നതാണ് ഉമ്മച്ചീസ് എന്ന ബ്രാൻഡ്.
ഉമ്മച്ചീസ് എന്ന ബ്രാൻഡിന്റെ പിറകിൽ അൻസിയുടെയും ഉമ്മച്ചിയുടെയും വിയർപ്പിന്റെയും ആത്മവിശ്വാസത്തിന്റെയും കഥയുണ്ട്.
പരിഹസിച്ചവർക്ക് മുന്നിൽ ഉത്തരമായി ഉമ്മച്ചീസിന്റെ നിർമ്മാണ യൂണിറ്റ് തലയെടുപ്പോടെ തൃശൂർ ജില്ലയിൽ ഇന്നും നിലകൊള്ളുന്നു. തൃശ്ശൂരിൽ തന്നെ പലസ്ഥലങ്ങളിലും ആയി ഉമ്മച്ചീസിന്റെ ഔട്ട്ലെറ്റുകളും പ്രവർത്തിക്കുന്നു.
ഉമ്മച്ചീസിന്റെ കാച്ചിയ എണ്ണയുടെ മണം കടൽ കടന്നും വ്യാപിച്ചിരിക്കുന്നു. പ്രത്യേക പരസ്യമോ മാർക്കറ്റിംഗിന്റെ ആവശ്യമോ ഇന്നേവരെ വേണ്ടി വന്നിട്ടില്ല. മൗത്ത് ടു മൗത്ത് പബ്ലിസിറ്റി തന്നെയാണ് ഉമ്മച്ചീസിന്റെ പ്രത്യേകത. ഗുണനിലവാരത്തിന്റെയും മികച്ച റിസൾട്ടിന്റെയും ഉത്തമ ഉദാഹരണമായി ആദ്യത്തെ കസ്റ്റമർ ഇന്നും സ്ഥിരം കസ്റ്റമർ ആയി ഉമ്മച്ചീസിന്റെ കൂടെ തന്നെയുണ്ട്.
ഉമ്മച്ചീസിന്റെ ഹെയർ ഓയിലിനു പുറമേ സ്കിൻ കെയർ, ബേബി കെയർ, ഹെയർ പ്രോഡക്റ്റ്സും നിലവിൽ ഇതേ ബ്രാൻഡ് നെയ്മിൽ നിർമ്മിക്കുന്നുണ്ട്. ഇതിനായി അൻസി കോസ്മെറ്റോളജി കോഴ്സും പഠിച്ചെടുത്തു. സ്വന്തമായി പ്രോഡക്റ്റ് നിർമ്മിച്ച് ട്രേഡ് മാർക്കും ലൈസൻസും കരസ്ഥമാക്കി.
ഉമ്മച്ചിയും മകളും കൈകോർത്ത് മെനഞ്ഞ ഉമ്മച്ചീസ് ഇന്ന് ഇരുപത്തി അഞ്ചിലധികം ആളുകൾക്ക് തൊഴിൽ നൽകുന്ന ഒരു സംരംഭമാണ്. കൂടാതെ പ്രോഡക്റ്റ് ഉണ്ടാക്കുവാൻ വേണ്ട ഔഷധ ചെടികളും മറ്റും കൃഷി ചെയ്യാനായും ഒരുപാട് സ്ത്രീകളുടെ സഹായങ്ങൾ കൂട്ടായി ഉണ്ട്. ഇതുവഴി അവർക്കും ഒരു വരുമാനമാർഗം ആയി മാറുന്നതിൽ അതിയായ സന്തോഷമുണ്ട്.
ഇന്ന് വനിതാ സംരംഭകർക്ക് ലഭിക്കുന്ന സ്വീകാര്യതയൊന്നും കുറച്ചുകാലം മുൻപ് വരെ ലഭിച്ചിരുന്നില്ല.
ഉമ്മച്ചീസിന്റെ തുടക്കത്തിൽ വനിതാ സംരംഭകർ എന്ന നിലയിൽ ഏറ്റുവാങ്ങേണ്ടി വന്ന പുച്ഛങ്ങൾക്ക് പരിധിയുണ്ടായിരുന്നില്ല. എന്നാൽ ഇന്ന് അഭിമാനത്തോടെ തന്നെ അൻസി മറുപടി പറയുന്നു “അതെ ഞാനൊരു അറിയപ്പെടുന്ന വനിതാ സംരംഭക തന്നെയാണ്”
ഉമ്മച്ചീസ് എന്ന ലോകോത്തര ബ്രാൻഡ് ആണ് അൻസിയുടെ അടുത്ത കിനാവും ലക്ഷ്യവും.
