ഒരു ആശയം ജീവസുറ്റതാക്കുകയും ഒരു കാഴ്ചപ്പാടിനെ പ്രകടമായ അനുഭവമാക്കി മാറ്റുകയും ചെയ്യുന്ന കലയാണ് ഇവന്റ് മാനേജ്മെന്റ്. അത് ഒരു വിവാഹ ആഘോഷമായാലും ഉയർന്ന നിലവാരമുള്ള കോർപ്പറേറ്റ് കോൺഫറൻസായാലും തിരക്കേറിയ സംഗീത ഉത്സവമായാലും, വിജയകരമാക്കി തീരുന്നത് ഇവന്റ് മാനേജ്മെന്റിന്റെ സൂക്ഷ്മമായ ആസൂത്രണം, ഫലപ്രദമായ ഏകോപനം, സർഗ്ഗാത്മകത എന്നിവയെ ആശ്രയിച്ചിരിക്കുന്നു. ഇന്ന് ഇവന്റ് മാനേജ്മെന്റ് മേഖലയിൽ നീണ്ട 32 വർഷത്തെ പാരമ്പര്യം കാത്തുസൂക്ഷിക്കുന്ന കമ്പനിയായ ആഡ് വെൻചർസിനും സോഫി ലുക്കാസ് എന്ന സംരംഭകയ്ക്കും പറയാനുള്ളതും ഇവൻ്റ് മാനേജ്മെന്റിന്റെ സങ്കീർണ്ണമായ ലോകത്തിൽ കൃത്യമായ ആസൂത്രണം, നിർവ്വഹണം, ദീർഘവീക്ഷണം എന്നിവയാൽ കരുത്തു തെളിയിച്ചു വെന്നിക്കൊടി പാറിച്ച കഥയാണ്.
Sophy lukose – Executive director
ബിസിനസ്സ് ആവശ്യങ്ങൾക്കായി ഭർത്താവിനോപ്പമാണ് സോഫി കോഴിക്കോട് നഗരത്തിൽ എത്തുന്നതും പിന്നീട് സ്ഥിര താമസമാക്കുന്നതും. ഒരു ക്രീയേറ്റീവ് പരസ്യ ഏജൻസി ആയിട്ടായിരുന്നു ഈ സ്ഥാപനം 1992ൽ ഇവർ തുടങ്ങിയത്. ആ വർഷം നടന്ന ഒരു മെഗാ ഫാഷൻ ഷോ ബാംഗ്ലൂർ ക്ലയന്റിന് നല്ല രീതിയിൽ നടത്തികൊടുത്തുകൊണ്ടാണ് ഇവെന്റ് മേഖലയിലേക്ക് കടന്ന് വരുന്നത് . ഈ ഒരു മേഖലയ്ക്ക് ഭാവിയിൽ ഒരുപാട് സാധ്യതകളുണ്ടെന്ന അന്നത്തെ തിരിച്ചറിവിൽ നിന്നുമാണ് ഇതൊരു പ്രൊഫഷനായി നിലവിലുള്ള ആഡ് ഏജൻസിയോട് കൂട്ടി യോജിപ്പിക്കാം എന്ന തീരുമാനം എടുത്തത്. തുടങ്ങിയ സമയത്ത് കേരളത്തിൽ ഈ മേഖലയിൽ മത്സരങ്ങൾ കുറവായിരുന്നതിനാൽ കേരളത്തിന് പുറത്ത് നിന്നും വരുന്ന ക്ലയന്റ്സെല്ലാം വലിയ പരിപാടികൾക്ക് ആഡ് വെൻചർസിനെ ആയിരുന്നു ആദ്യം സമീപിച്ചിരുന്നത്. പല തരം ഇവന്റുകൾ പേർസണൽ ഇവന്റുകളും, കോർപ്പറേറ്റ് ഇവന്റുകളും എല്ലാം ഭംഗിയായി ചെയ്തു കൊടുത്ത് ഒരു സ്ഥാനം ഉണ്ടാക്കി എടുക്കാൻ ചുരുങ്ങിയ സമയം കൊണ്ട് കഴിഞ്ഞു ഈ സംരംഭകയ്ക്ക്. കൂടാതെ കാലിക്കറ്റ് പോലൊരു ചെറിയ നഗരത്തിൽ നിന്നും ഒരുപാട് നെറ്റ്വർക്കുകളും ഈ ഒരു മേഖലയിലൂടെ ഉണ്ടാക്കിയെടുക്കാൻ കഴിഞ്ഞതും ഒരു ഭാഗ്യമായി കാണുന്നു സോഫി. 2006 മുതൽ ആഡ് വെൻചർസ് വെഡിങ്ങുകൾ ചെയ്തു നൽകാൻ തുടങ്ങി. അതിന് നിമിത്തമായത് കോഴിക്കോട്ടെ ഒരു പ്രമുഖ വ്യവസായ ഗ്രൂപ്പിന്റെ ചെയർമാന്റെ മകന്റെ വിവാഹവും, അതിനോടനുബന്ധിച്ച് കോഴിക്കോട് തന്നെയുള്ള ഒരു റിസോർട്ടിൽ ബോളിവുഡ് സെലിബ്രിറ്റികൾ അടക്കം ഉള്ളവർ പങ്കെടുക്കുന്ന ഇവന്റ് കേരളത്തിൽ പ്ലാൻ ചെയ്യാൻ ആളില്ലാതെ വന്നപ്പോഴാണ് ആഡ് വെൻചർസിനെ അദ്ദേഹം സമീപിക്കുന്നതും, പരിപാടി വിചാരിച്ചതിലും നന്നായി ചെയ്തുകൊടുക്കപ്പെട്ട തും . കസ്റ്റമൈസ്ഡ് തീം ഇവെന്റുകളായിരുന്നു ഇവർ കൂടുതലും നൽകി വന്നിരുന്നത് . കോഴിക്കോട് നഗരത്തിൽ ഈ ഒരു ആശയം ആദ്യമായി കൊണ്ടുവന്നതും ഇവർ ആയിരുന്നു. ക്ലയന്റിന് ഇഷ്ടമുള്ള തീമിൽ സ്റ്റേജും മറ്റും കൃത്യമായി സെറ്റ് ചെയ്ത് നൽകി എല്ലാവരെയും അത്ഭുതപ്പെടുത്താൻ കഴിഞ്ഞിരുന്നത് ഈ മേഖലയിൽ വേറിട്ട നിൽക്കാൻ ഇവരെ സഹായിച്ചു .
പ്രണയിച്ച് വിവാഹം കഴിച്ച തന്റെ ഭർത്താവിന് ഒരു പിന്തുണ എന്ന രീതിയിൽ ഈ മേഖലയിലേക്ക് കടന്ന് വന്ന സോഫിക്ക് പിന്നീടിതൊരു പാഷൻ തന്നെയായിരുന്നു. മറ്റു ജോലികളെല്ലാം മാറ്റിവച്ചു ഇവന്റ് പ്ലാനിംഗിൽ തന്റെ ശ്രദ്ധ നൂറ് ശതമാനം നൽകിയാണ് കമ്പനിയെ സോഫി വളർത്തി എടുത്തത്. അക്കാലത്തു ജീവനക്കാർ കുറവായിരുന്ന സ്ഥാപനത്തിൽ മാർക്കറ്റിംഗ് ചെയ്യുന്നത്തിനായി ആരും തന്നെ ഇല്ലായിരുന്നു. മാത്രമല്ല എല്ലാ കാര്യങ്ങളും സ്വയം തന്നെ ചെയ്യണമെന്ന നിർബന്ധവും ഈ ദമ്പതിമാർക്ക് ഉണ്ടായിരുന്നു. കൊറോണയുടെ മുന്നേ വരെ ഇങ്ങനെ സ്വയം എല്ലാം നോക്കിചെയ്ത ഇരുവരും കൊറോണ വന്നതിന് ശേഷം ഇവന്റുകൾ എല്ലാം കുറച്ച് കൂടി സീരിയസ് ആയി കൈകാര്യം ചെയ്യാൻ തീരുമാനിക്കുകയായിരുന്നു. കാരണം ഇത്രയും കൃത്യമായി നിർവചിക്കപ്പെട്ട സമയപരിധി ഉള്ള ഒരു ജോലിയും വേറെ ഇല്ല എന്നത് തന്നെ. നിശ്ചയിച്ച സമയത്ത് ഏറ്റെടുത്ത കാര്യങ്ങൾ കൃത്യമായി പൂർത്തീകരിക്കാൻ സാധിച്ചില്ലെങ്കിൽ പിന്നെ ഇതിന് യാതൊരു പ്രസക്തിയും ഇല്ല. ആയതിനാൽ ചിന്തകൾക്ക് മൂർച്ച വേണം, അപാരമായ ഓർമ്മശക്തി വേണം. അതിനാൽ നിലവിലെ സ്ഥാപനത്തിൽ ഒരു പറ്റം കുട്ടികളെ പരിശീലിപ്പിച്ചു ഇവന്റുകൾ പലതും അവരെക്കൊണ്ട് പ്ലാൻ ചെയ്യിപ്പിച്ചു പിന്തുണ നൽകി നടത്തിപ്പിക്കുകയും ചെയ്തു. അങ്ങനെ ഇതൊരു ഓട്ടോമേറ്റഡ് പ്ലാറ്റ്ഫോം ആയി മാറ്റിയെടുത്ത് മുന്നോട്ട് കൊണ്ടുപോവാൻ സാധിച്ചു. ഈ ഒരു പരിശീലനത്തിലൂടെ യുവ തലമുറയെ ഈ ഒരു മേഖലയിലേക്ക് പലതും പരിചയിപ്പിച്ചും പഠിപ്പിച്ച് നൽകിയും വാർത്തെടുക്കാൻ സാധിച്ചു. നിലവിൽ സ്ഥാപനത്തിൽ ഇങ്ങനെ പരിശീലിപ്പിച്ച 10 പേർ അടങ്ങുന്ന ഒരു ടീമിനെ നിയോഗിച്ചാണ് കാര്യങ്ങൾ കൃത്യമായി നടത്തി വരുന്നത്. ഭാവിയിൽ ഇനിയും നല്ല ടീമുകളെ ഉണ്ടാക്കിയെടുക്കാൻ പദ്ധതികളുണ്ട് അതിലൂടെ ബ്രാഞ്ച് വളർത്താനാണ് ഉദ്ദേശിക്കുന്നത് .
വെഡിങ് പ്ലാനിങ് വേറൊരു ഡിവിഷൻ തന്നെയായാണ് കൊണ്ട് പോകുന്നത്, മറ്റൊരു ബ്രാൻഡ് നെയിം ആയ റോസാ ജൂലിയേറ്റ് എന്ന നാമത്തിൽ പ്രീമിയം വെഡിങ്ങുകൾ മാത്രം ചെയ്തുകൊടുത്തുകൊണ്ട് വളരെ വിജയകരമായി മുന്നേറുന്നു. ആഡ് വെൻചർ എന്ന സ്ഥാപനത്തിനെയും റോസാ ജൂലിയേറ്റിനെയും സൗത്ത് ഇന്ത്യയിലെ നമ്പർ വൺ കോർപ്പറേറ്റ് ആൻഡ് പ്രീമിയം ഇവന്റ് മാനേജ്മെന്റ് കമ്പനിയാക്കുക എന്നുള്ളതാണ് ഇവരുടെ വിഷൻ.
“ദൂരെ നിന്നും കാണുന്ന ഗ്ലാമർ കണ്ട് എടുത്ത് ചാടാൻ പറ്റിയ ഒരു മേഖല അല്ല ഇവന്റ് മാനേജ്മെന്റ്. ഇതിനു പിന്നിലെ അധ്വാനം വളരെ വലുതാണ്. പല തരം പ്രതിസന്ധികൾ നിറഞ്ഞതാണ്. ഇവന്റിന്റെ ഫാബ്രിക്കേഷനുകൾ മിക്കതും പുറത്തുള്ള ജോലിക്കാരെയും, ആർട്ടിസ്റ്റുകളെയും ആശ്രയിച്ചാണ് ചെയ്യേണ്ടത്, ആയതിനാൽ കൃത്യമായ പ്ലാൻ ബി, പ്ലാൻ സി ഇല്ലാതെ മുന്നോട്ട് പോവാൻ പാടില്ല . പെട്ടന്ന് കാര്യങ്ങൾ മാറി മറിയാം അതിനാൽ നല്ലൊരു ഇവന്റ് മാനേജർ എപ്പോഴും നല്ലൊരു ഡിസാസ്റ്റർ മാനേജർ കൂടെ ആയിരിക്കണം. ഡെഡ് ലൈനിനുള്ളിൽ നിന്ന് കൊണ്ട് അതിലുണ്ടാകുന്ന പ്രശ്നങ്ങളെ പരിഹരിച്ചു ക്ലയന്റിനു അവരുടെ ആവശ്യങ്ങൾ ഭംഗിയായി നടത്തി കൊടുക്കാൻ സാധിക്കുന്നിടത്താണ് നമ്മുടെ വിജയം” സോഫി പറയുന്നു….
